Баъзан бир айблов инсон тақдирини бир зумда остин-устун қилиб юбориши мумкин. Шунинг учун ҳам адолат шошқалоқликни эмас, ҳақиқатни талаб қилади.

Хоразм вилояти Хонқа туманида яшовчи Сумайя Абдуллоҳева (исм-шариф ўзгартирилган) ана шундай оғир синовдан ўтди. У уйида болаларга диний сабоқ бериб юрган пайтда, 8 нафар болани қийнаган, калтаклаган, деган оғир айблов билан жиноят ишига тортилди. Тергов идоралари ҳатто уни қамоққа олишни ҳам сўради.

Аммо суд шошилмади.

Суд аввал инсон тақдирига қаради. Сумайя Абдуллоҳева аввал судланмаган, уч нафар фарзандни тарбиялаётган она, муқим яшаш жойига эга. Тергов чақирувларига ўз вақтида келган. Шу сабаб суд уни қамоққа олишга асос йўқ, деб топди ва уй қамоғи билан чекланди.

Иш судгача етиб келди. Ана шу ерда ҳақиқат секин-аста юзага чиқди.

Судда болалар ва уларнинг ота-оналари гувоҳлик берди. Уларнинг барчаси бир овоздан: “Бизга ҳеч ким қўл кўтармаган”, - деди.

Маълум бўлишича, болалар у ерга ўз ихтиёри билан, ота-оналарининг розилиги билан диний савод ўрганиш учун келиб турган. Кўпчилиги эса унинг қариндошлари ёки қўни-қўшниларининг фарзандлари бўлган.

Шу пайт яна бир ҳақиқат очилди.

Сумайя Абдуллоҳева оддий инсон эмас. У араб ёзувини яхши билади, Қуръон қироатини пухта ўзлаштирган. Қуръон қироати бўйича ўтказилган мусобақанинг вилоят босқичида биринчи ўринни олган, республика босқичида ҳам қатнашган ва Ўзбекистон мусулмонлар идорасининг дипломи билан тақдирланган.

Суд текширувлари давомида айбловни тасдиқлайдиган далиллар топилмади. Айрим даъволар эса асосланмагани маълум бўлди.

Натижада суд жуда муҳим хулосага келди: Сумайя Абдуллоҳеванинг ҳаракатларида жиноят таркиби йўқ.

Шу асосда унга нисбатан оқлов ҳукми чиқарилди. Уй қамоғи бекор қилинди. Кейинчалик бу қарор апелляция судида ҳам кўриб чиқилиб, ўзгаришсиз қолдирилди.

Албатта, ишда яна бир жиҳат бор эди. У расмий рухсатсиз болаларга диний таълим бергани учун маъмурий жавобгарликка тортилиб, жарима тайинланди.

Аммо энг муҳими шундаки, оғир жиноят айблови исботланмади.

Бир инсонга қўйилган оғир айбловлар судда синалди. Айрим гумонлар эса ҳақиқат қаршисида бардош бера олмади.

Шу тариқа бир она, бир инсоннинг тақдирига қўйилган оғир соя адолат қарори билан тарқади.

Чунки инсон тақдири ўйинчоқ эмас. Бир айблов ортида бутун бир оила, болалар ва келажак туриши мумкин.

©️Манба